- عايز أكلمكم شوية النهاردة عن جيفارا كتير منكم يعرف عنة حاجات كتير وأقوال مأثورة..لكن انا متأكد انكم هاتشوفوه من ناحية تانية فى كلامى .. هى بعض الفقرات او فل نعتبرها قصاصات مجمعة أرجوا انها تعجبك ورسالتى توصل==================================================
ولد #جيفارا سنة 1928 لخمسة أخوة .. وكان عندة ربو وهو صغير _ عشان كدة ابوة انتقل للجبال _ مكنش فى موسعات شعب او غيرها وكان الربو عذاب فعلا .. لف جيفارا امريكا اللاتينية على طريقة " اوتوستوب " اللى كان لسة اختراع اياميها قبل مايتحول لموضة اواخر الستينات واوائل السبعينات===============فى حياة كل منا لحظة حياتة لا تعود فيها كما كانت ابداً .. وكانت اللحظة دى بالنسبة ل #جيفارا هى التفاف الاخطبوط الامريكى على دول امريكا اللاتينية .. التفاحة اللى سقطت من الاسبان .. ومستنية قضمة الوحش الامريكى .. عشان كدة تلاقى فترة الستينات والسبعينات قمة العمل الاستخباراتى ل " CIA " فى امريكا اللاتينية===============عشان كدة تلاقى تاريخ الحقبة دى _ ومازال الحقيقة فى بلاد كتير _ لامريكا اللاتينية عبارة عن جنرات ديكتاتوريين فاشيين باوسمة ونياشين وبلاد يعمها الفقر .. كانت هذه الفكرة تؤرق مضجع #جيفارا فعلا .. حتى لما راح المكسيك وبدأ يتدرب على حرب العصابات فى " مكسيكو سيتى " ثاب ثائر لا يكف عن تدخين السيجار _ رغم الربو اللى عندة _ الحقيقة لازم أعترف أن حركة انى مشربش السيجار الكوبى مرة واحدة دى متعلمها منه .. لازم اقطع السيجار نصين واشرب كل نص لوحدة===============الغضب يرسم شروخة فى قلب #جيفارا الاسد الحبيس .. هنا يلعب القدر لعبتة الاثيرة .. يقابل جيفارا ثائر اخر لا يكف عن تدخين السيجار .. ملتحى .. أشعث أغبر .. الحقيقة ان حياة جيفارا تغيرت كليا بعد مقابلتة للشاب دة .. الشاب كان كوبيا .. وكوبا كانت ترضخ تحت قيادة ديكتاتور كتب اسمة بالدم فى صفحات التاريخ .. كان الديكتاتور هو " باتستا " وكان الشاب الثائر الملتحى الذى لا يكف عن تدخين السيجار هو " فيدل كاسترو " !!!===============#جيفارا كان ارجنتينى _ ناس كتير معتقدة انه كوبى _ لكن لما بدأ " كاسترو " يخطط للثورة فى كوبا على حكم الطاغية " باتستا " قرر جيفارا انه يروح معاهم .. ومن هنا بدأت اسطورة الثائر الذى لا له دولة ولا وطن ولكن يحارب من أجل حرية الشعوب المظلومة فى أى مكان .. فى رأيي ان " كاسترو " كان السبب الرئيسى فى شهرة جيفارا وكان أحد أهم الاسباب اللى اشعلت حماس الثائر بداخلة .===============لقب #جيفارا نفسة بلقب " تشى " وهى كلمة ارجنتينية كناية عن أى مواطن .. زى مابنقول احنا على اى حد " حمادة " ..أو بورسعيدى " ابو العربى " او حتى المانى " فريتز " !===============كانوا 80 رجلاً .. #جيفارا وكاسترو وغيرهم من الشباب الثائر .. وعلى مركب " جرانما " او جراند ما " " الجدة " زحفوا على كوبا فى جنح الليل عام 1956===============من أكثر اللحظات الحاسمة والمواقف المؤثرة فى حياة #جيفارا هو عندما هجمت عليهم قوات " باتستا " فى معسكرهم الصغير المخفى .. تساقط الكثيرون .. وبقى قليل من الثوار .. وهنا وجد جيفارا نفسة امام صندوقين .. صندوق معدات طبية وصندوق ذخيرة .. فاختار الذخيرة وكأنما اختار هدف حياتة .. ترك مهنة الطب هناك فى الارجنتين .. فقد وجد لة مهنة أخرى الان !===============الحقيقة مفضلش من ال 80 ثائر غير 15 وكان #جيفارا بينزف بغزارة من صدرة واماكن اخرى وهرب للجبال ومنها عرف من القرويين ان كاسترو برضة هرب هو وبضع شباب معاة .. هربوا للجبال ومنها بدأت حرب العصابات اللى عمل منها جيفارا كتيب يشرح اساليبها اللى بقى من أكتر الكتب مبيعا فى العالم===============فقط 22 بندقية _ واخدين بالكم يا اخوان _ قام هذا الشباب الثائر بأكبر ثورات امريكا اللاتينية #جيفارا وكاستروا ومن معهم .. شباب كل غايتة بلدة فقط .. التمرد كما يجب ان يكون .. الحرية كما رسمت فى كتب الاساطير .. وهنا بدأ أول هجوم كبير لهم على قوات " باتستا " فى " لابلاتا" من المواقف اللى تحسسك فعلا بقد اية الشباب ممكن يغير الكون وان الحياة مكنتش بتمثلهم اى غاية .. انهم بعد كل هجوم خاطف كانوا بيسرقوا البيض من تحت فراخ المزارع عشان ياكلوة .. ويسبوا بيضة واحدة تحت الفرخة عشان تكمل بيض عليها .. قبل الهجوم أكلوا البيضة دى كمان من تحت كل فرخة .. حسوا انهم مش هايرجوا تانى .. هايموتوا .. ورغم ذلك بدأوا الهجوم الكبير !===============أكثر الاعوام حسما والمعارك شراسة كان فى عام 1957 كانت نقطة فاصلة فى حياة #جيفارا وكاسترو وكوبا وغالبا العالم اجمع .. دى السنة اللى تم فيها هجومهم على معسكر " أوفيرتو " واللى كان ل جيفارا فيها دور كبير قوى سواء من الناحية العسكرية او الطبية _ كدكتور _ ومنها بدأ يكون لية وحدتة الخاصة .. الحقيقة الحكومة مكنتش مديالة اهتمام كبير رغم انه بقى من قيادات المقاومة بعد المعركة دى .. كانت مركزه اهتمامها كلة على كاسترو !================وحدة #جيفارا الثابتة كانت احد اهم وحدات جيش المقاومة .. كمان جيفارا امر بعمل مصنع أحذية ومصنع ذخيرة ومحطة اذاعة .. واللى بيتسائل عمل التلاتة دول بالذات لية تعالى اقولك .. فى الحروب اهم حاجة ان الجندى يكون لابس حذاء جيد يتحمل الظروف السيئة واللى ممكن تخلى المقاتل لابس حذاءة بالايام .. الذخيرة مفيش حرب بدون ذخيرة .. محطة الاذاعة لبث الحماس ونشر الافكار الثورية .. المهم الاذاعة بدأت تدعوا العمال للأضراب وبدأت الحرب تشتعل !================صرخة #جيفارا ياعبيد
فى أى موطن أو مكان
مفيش بديل
مفيش مناص
ياتجهزوا جيش الخلاص
ياتقولوا ع العالم خلاص !================أكثر المهمات خطورة واللى اسندها كاسترو ل #جيفارا كانت مهمة غزو " لاس فيلاس " كانت من أخطر المهمات فى حياة جيفارا .. تخريب جسور معدات منشأت جيش .. قتل .. قتل اعدام خونة مقابلات مع محطات اجنبية وبدأ العالم يشوف الثوار الملتحين اللى بيدخنوا سيجار !================وحدثت المعجزة سنة 1959 وهرب " باتستا" وسقطت " هافانا " _ عاصمة كوبا _ فى يد #جيفارا وكاستروا .. الملتحين مدخنى السيجار القادمون من الجبال .. 80 رجلا أصبحوا 15 ثم أسقطوا طاغية ودولة فى ايديهم .. ومن هنا جاءت مقولة جيفارا التاريخية .. " أعتقد أن نواة صلبة من 30 الى 50 رجلا اذا توافرت لهم الظروف الملائمة والارض الصالحة للعمل تستطيع ان تبدأ اى ثورة مسلحة فى امريكا الجنوبية " !================زار #جيفارا دول كتير لكن اللى استرعى انتباهى كلامة عن #عبد_الناصر الحقيقة كان عبد الناصر بيمثل جزء من قدوة كل ثائر فى العصر دة .. تعالوا أحكيلكم إزاى ان جيفارا اصلا مكنش معروف عالميا واصبح اسطورة بالكلام المتداول فقط حتى صورتة اللى ظهرت وبقت شعار الحرية والثورة فى كل العالم ما اتنشرتش غير بموقف غريب .. تعالوا احكيلكو علية==============عينى علية ساعة القضا
من غير رفاق تودعة
يطلع انينة للفضا
يزعق .. ولا مين يسمعة !===============صورة #جيفارا الوحيدة اللى انتشرت فى العالم كالنار فى الهشيم التقطها " البرتو كوردا " المصور العبقرى .. كان جيفارا واقف ورا كاسترو فى احدى خطبة شارد الذهن فأسرع " كوردا " بالتقاط الصورة اللى اصبحت اشهر صورة فى القرن العشرين بعد ماتم طباعتها بما يعرف بالشاشة الحريرية " سيلك سكرين " اللى بتلغى درجات الرمادى ويبقى ابيض واسود بس بالشكل اللى بيخلى اى صورة لأى حد بطل اسطورى .
" أبلغوا القيادة أن بابا معنا "
تلك كانت الجملة الشفرية التى وصلت للمخابرات الامريكية .. و " بابا " تعنى #جيفارا .. إى أن جيفارا تم القبض علية .. " وبابا متعب " ! تلك هى الثانية .. أى أنه مجروح أيضا ً .. نعم هنا سقط البطل .. فى مدرسة فى " بوليفيا " حيث كانت آخر معاركة ... تفاصيل القبض علية تستاهل انى اكتب تدوينة والله لأن مش كتير يعرفوا التفاصيل دى .. والله فكرة .. هاجمع اللى كتبتة فى تدوينة ان شاء الله .. لكن كيف سقط الليث ؟===================عينى علية ساعة القضاأربع رجال يحملون #جيفارا الجريح .. بينما يمشى " سارابيا " رفيقة البوليفى مقيد اليدين خلف الموكب .. آخر خريف يراه جيفارا الاسطورى .. وعندما لم يجدوا سجن فى تلك القرية .. جعلوا من تلك المدرسة سجنة ومثواة الاخير !!==================
من غير رفاق تودعة
يطلع انينة للفضا
يزعق .. ولا مين يسمعة !==================يرفع " رستو " رجل المخابرات الامريكية السماعة ليحادث " جونسون " شخصيا .. #جيفارا معنا .. اسقط البوليفيون _ معنا _ جيفارا .. الصداع الدائم للولايات المتحدة خمد .. الاسد الاسطورى الجريح جرح الموت فى قبضة القرود .. نعم يا سادة .. الاسطورة فى قبضتنا !==================ماذا نفعل ب #جيفارا ؟
- نحاكمة
- هل نحاكمة ونصنع منة اسطورة
- نقتلة
- اذن فلنعدمة حالا !!
ولكن جيفارا يطلب رؤية ناظر المدرسة !!!!!!!!!=================كانت إمرأة .. خلدها التاريخ بآخر من رأى #جيفارا اسمها " جوليا كرتز" كانت تتوقع اسد او ذئب واللعاب يسيل من شدقية .. تلك الصورة التى رسخها النظام فى اذهانهم .. زى بالظبط الفيلم القذر اللى عملة " عمر الشريف " عن تشى جيفارا وصورة كأنة مخبول _ طبعا كان انتاج اميركى _ لكنها وجدت ثائر جريح يلفظ انفاسة الاخيرة .. إقتربى ياعزيزتى فلدى ما أقولة !!!!=================#جيفارا : إن مدرستك ضيقة تشبة السجن .. كيف تدرسين فى مكان كهذا ؟ فى كوبا يستحيل ان تجدى مدرسة كهذه !!
جوليا الشابة الحسناء ناظرة المدرسة :
بلدنا فقير
جيفارا : لكن حكامكم يركبون المرسيدس .. لهذا جئت كى أحرركم
- جوليا صارخة : بل جئت تقتل جنودنا
تلك المحادثة الخالدة التى كشف عنها بعد وقت طويل من موت الاسطورة .. فرت الحسناء بعد صرختها لكنها_ كما قالت _ لم تنس قط التماعة عين جيفارا حتى وهو يموت !!=================
يمكن صرخ م الالم
من لسعة النار فى الحشا
يمكن ضحك ..أو ابتسم
أو ارتعش أو إنتشى================من جمل #جيفارا الخالدة جملة قالها لما الظابط " رودريجز " قالة : الاوامر البوليفية _ نسبة لدولة بوليفيا _ انى اقتلك لكن الامريكيين يطلبونك حى "
رد جيفارا وقال " الموت أفضل لى .. كان يجب الا أقع أسيرا من البداية " !!!================فى غرفة الظابط يتناقشون من يقتل #جيفارا ؟؟
واتفقوا على لعبة اعواد القش .. كل واحد يسحب عود واقصر عود هو اللى يقتلة .. تخيلوا .. اى مهزلة بتحصل .. ودة بيبينلك قد اية عبثية الحياة اللى انت عايشها !!
كان العود من نصيب رقيب اسمة " تيران " اللى اتخلد اسمة برضة فى التاريخ بأنة قتل اسطورة الحرية فى كل الازمان !===============يمكن ضحك أو إبتسم !!===============آخر جملة قالها #جيفارا فى حياتة واللى اتخلدت برضة كأحد أكثر الجمل صمودا ورجولة .. الرقيب " تيران " يمسك بمسدسة .. يصوبة ناحية البطل الاسطورى .. يقول جيفارا بزأير الاسد الاخير .." لا تفعل الا بعد أن أنهض على قدمى .. هلم .. أقتلنى .. أنت فقط تقتل رجلا " !!
يصوب الرقيب " تيران " بمسدس مهتز ويطلق النار على اى مكان من الممكن ان يقتل رجلا .. صدرة بطنة عنقة .. هنا .. تعالت السادية فى نفوس الجميع .. وبدأ الكل فى اطلاق النار على الجسد الميت اصلا للأسد الثائر !!===============يمكن لفظ آخر نفس
كلمة وداع لاجل الجياع
يمكن وصية
للى حاضنين القضية فى الصراع===============صوروا الثائر " الحالم الاخير " فى زمن البطش .. صوروا جيفارا .. تلك الثورة التى خُلدت هى الاخرى .. صورتة وهو ميت والدم والوحل يغطية .. اصابوا كل جسدة ماعدا وجهة كما أمر الظابط " رودريجز " .. تلك الصورة التى حفظها الجميع لشبح شاب وسيم يبتسم ساخرا وعينة مفتوحة قليلا كأنة يقوم من غفوة نوم .. تلك الصورة الخالدة التى قالت عنها ناظرة المدرسة " جوليا " بعد 30 عاما:
" كان من الخطأ أن اسمح لهم بتصويرة بعد وفاتة .. لقد بدا لى كالسيد المسيح .. لاشك ان شباب العالم كلة قد لاحظوا هذا الشبة " !!
الاثنين، 24 يونيو 2013
بمناسبة 30 يونيو .. عن جيفارا أتحدث
الاشتراك في:
تعليقات الرسالة (Atom)
ليست هناك تعليقات:
إرسال تعليق